الصفحات

الخميس، 16 يناير، 2014

حكايتي مع الحياة الصحية


 السلام عليكم ورحمه الله وبركاته ...


الموضوع يلي تبغوني اكتبو من زمان .... بس ماتصير الظروف اخيرا بدأت اكتبو

متى بدأت اكل اكل صحي ومين شجعني وكيف النظام دا ماشي مع عائلتي...



قبل ما ابدأ في شهر مايو may اظن كان بالعربي نهايه رجب وبدايه شعبان من عام ٢٠١٣-١٤٣٤
لانو انا بدأت قبل رمضان....
كانت حياتنا عاديه ناكل عادي الفواكه والخضار نادرا ما كنت اكلها غير البرتقال والتفاح والعنب والطماطم


حتى الموز ما كنت احبو واكل المطعم نطلب توصيل كل يومين او لما اكون مشغوله ومايمديني اطبخ...

المهم اول شي انا بدأت في القرين سموذي كنت اتفرج على ناس في اليوتيوب يصورو كل يوم حياتهم اليوميه...
وكان الرجال دايما يعمل القرين سموذي وعجبتني الفكره اني ادخل خضار في جسمي عن طريق الشرب 
لاني لو تصدقو ما احب السلطه ....
ومن هنا اكتشفت عالم السموثي صراحه انا مرتاحه معاه بدخل فواكه وخضار في جسمي انا ماكنت اصلا اكلها





ومشيت على كدا والباقي عادي ... بعدين طحت على حساب the diet ninja  قلتلكم كم مره قد ايش اثر في خياراتي
ومن هنا خلاص بدأت اغير تفكيري ١٨٠ درجه...



انا والمقاضي:-

اول الواحد يروح البقاله اخد اي شي اشتهيه شكولا شبس حلاوه الاجبان الشرايح ما يفرق معايا حاجة 

ما افكر  وكان ممكن غدايه يكون على شكولاته..

دحين ما انكر في المقاضي بندفع اكثر بحبه واثبت الدراسات انو الاكل الصحي اغلى شويه من الجنك 

والاشياء العاديه طبعا انا فكرت فيها كأستثمار في صحتي وصحه اولادي وبدأت اقطع مصاريف 

الكماليات حبه حبه كنت وقتها مدمنه مكياج وبدأت اقلل من هنا واحط هنا الميزانه كل واحد يقدر يرتبها 

ترا على حسب وضعو...


طيب...


ايش صرت اعمل اقرأ المعلومات الغذائيه والمكونات الموجوده في كل منتج حتى لو قالو عنو صحي لانو 

احنا عايشين في زمن الغش التجاري في زي السلام عليكم ثقفت نفسي من وحرجع اقول حساب 

thedietninji في الانستقراموصرت اقرأ وعرفت الفرق بين الدهون المشبعه والغير مشبعه الا مالا نهايه اها 

وكمان العيش الاسمر مو شرط يكون صحي لازم تقرأي المكونات اول عنصر موجود هو اكثر عنصر 

متواجد في المنتج دايما يكتوبو دقيق قمح يعني"ابيض" وبعدين  يكتبو دقيق نخاله او قمح كامل او الخ الخ...


صارت المقاضي حقتي اكثر حاجه الخضار والفواكه وبعدين دجاج او لحم او سمك وبعدين الحليب 

والاجبان الغير مصنعه طبعا الكميه حتختلف من عايله لاخري انا غالبا اقضي حق اسبوع او حق ٣ ايام..


 لو حطيتي في ثلاجتك اكل صح حتاكلي صح والعكس طبعا ..




انا والاولاد...




نزلت موضوع قبل كدا كيف احفزهم تحت عنوان انا والحلوين ارجعلو.... عشان تستفيدو


اوك ايش صرت اعمل لما يتعبوني انور تفكيرهم اجيب حكايات عن الاكل الصحي وكيف يخلينا اقوياء 

وبصحتنا حتى لما نكبر والشبش والحلويات كيف مضارها على الصحه والاسنان ولازم نقلل منها ...


دايما اعطيهم حق في الاختيار مثلا اقلهم تبغو تاكلو كسناك طماطم ولا خيار كل واحد يختار ايش يبغا


عشان يحسو انهم لهم هادا الدجاج ايش تبغو معاه وكم حبه دجاج تبغو وزي كدا ترا جدا يفرق احسن 


من انك تفرضي عليهم لما نروح البقاله اخليهم يحطو معايا الفواكه والخضار واشرحلهم فوائدها


نمر من جنب الحلويات والشبس اشرحلهم مضارها واقلهم كمان مسموح لكم تاكلو في نهايه الاسبوع 


مره بس هيا مضره وكدا وكدا... الحمد لله ما عمري شربتهم مشروبات غازيه لما طلبوها وهما صغار


حطيتها في الكاسه وكبيت ملح عليها وقرفو منها..وغير دا كلو لما يجوعو في البيت مراح يلاقو شي بطال ينقنقو عليه... هادا باختصار يلي بعملو معاهم يبغالو مجهود مو سهل بس لصحتهم نكافح وربنا يكتبلنا الاجر..


نجي دحين لابو الشباب..




صراحه جوزي كان لو فتره مهتم في الاكل ودايما اعملو وجباتو وياخدها معاه للشغل بحكم دوامو 

الطويليجي البيت اعملو سموثي واحط معاه الواي بروتين يلي يستخدموه الرياضين يقعد معانا الين 

الاولاد يناموويروح النادي... دحين لو ٥ شهور مخبص الدنيا وقف النادي حاجه مزعلتني بس زي ما ربنا 

قال "أنك لا تهدي من أحببت"والغدا بيتغدا في الشغل بس لما يجي عندي في البيت العشا بيكون صحي وبحول الله راح ارجعو لنظامو القديم..

التغير يلي حصل معايا




من غير تفاصيل بس بعد ولدي مو راضيه تنزل ال٣ كيلو الزياده وبالفعل ما نزلت الا بعد ماعدلت نظامي


الحمد لله طول عمري ماشيا على مبدأ الرسول صلى الله عليه وسلم "ثلث لطعامك وثلث لشرابك وثلث 

لنفسك"والحديث التاني بيقولو عنو ضعيف بس انا اخدت المبدأ "نحن قوم لا نأكل حتى نجوع وإذا اكلنا 

لا نشبع"حتى وانا ما كنت مختاره نوع الاكل الصح... بشرتي حسيتها صفيت مافيها حبوب كثير حتى 

وقت الدوره تطلع حبوب جدا خفيفه حساسيتي الحمد لله خفت عن زماناكتشفت انها من المواد المصنعه 

يلي بتدخل جسمي اول شعري بيطول اسرع الحمدلله التساقط خف بس موكثير لانو لو سبب تاني هوا 

قلقي يلي ان شاء الله ابطلو...وكمان مابدوخ زي اول راحت الحمدلله وسبحان الله تحسي في طاقه

في الجسم انا اول كان عندي هفتان وبس تعبانه ...



 

الماء:-



المويه وما ادراك ما المويه ترا ماراح ينزل وزنك اذا تبغي حتى لو اكلتي صحي ولعبتي رياضه غير بشرب 

المويه جيبي القواير الصغيره كل ساعه من يوم ماتصحي الين قبل النوم بساعه ساعتين وحتشربي 

كفايتك 




النوم...




مافي شي يضاهي النوم ٧ ساعات في الليل جسمك عضلاتك بشرتك خلاياكي كلها تتبني في الليل وكمان الجسم يحرق  سعرات اثناء النوم...



الرياضه:-



جدا مهمه طبعا حنبدأ اعذار حقتبس كلام من موضوع عملتلو ريبوست في الانستقرام اسمو لمتى انا سمين..


باراك اوباما رئيس دوله ويمارس الرياضه يوميا


لما تقولي ماعندك اراده لانك ماتبغيها هيا ما تبغاكي


مرتاحه بوضعي كذابه


مستحيل العب رياضه خليكي جاهزة للحياه مع الابر والكبسولات


لو ما اشتركتي في نادي معناه ماراح يمديكي ترا كل واحد يقدر يخصص ٤٥ دقيقه ساعه في اليوم 

للرياضه عندكم اليوتيوب مليان افتحيه واعزلي نفسك وابدائي خليه وقتك يلي تختلي فيه لحالك 

استمتعي المشي ٣٠ دقيقه في اليوم يقلل من احتمال الاصابه بالسكري..




في الجامعه في المدرسه في الشغل في السوق وقف سيارتك ابعد من مكان الشغل بشويه وامشي
استخدمو الدرج بدل المصعد




عندكم درج في البيت البسو جزمه الرياضه وابدأو العبو




اطلعو وانزلو اقفزو انتو وابداعاتكم






كثير مننا يعمل رجيم ويحرم نفسو ويرجع يخبص اكثر من اول 
انا مع مقوله سيبو الدايت وكلو صح لو اكلتو اكل صحي وانتو حبتوه من نفسكم لفوائده على جسمكم
واكلتو على قد احتياج جسمكم مو اكثر صدقوني حتنحفو وانتو ما حرمتو نفسكم 





العزايم:-





كثير بيقولو انهم بيخبصو في العزايم ترا عادي انا مو رجيم بس عشان بقلل كميه السكريات والاكل 

البطال لما اعرف عندي عزومه اكل قبل ما اروح وجبتي واشرب مويه كثير في المطعم اطلبي مويه قبل 

الطلبات واشربي فيها وخلصيها اذا جا الاكل اتحداكي تاكلي كميه كبيره اطلبي طلب واتقاسميه مع احد 

تاني عزومه في بيت الناس اطلبي مويه بدل العصيرات يلي يقدموها اشربي قهوه عربي عادي كلي تمره 

وحده بدل الشوكلاتات والموالح وقت العشا مو لازم تاكلي اكل او كلي سلطه اذا عارفه مافيها صوصات 

ثقيله كلي فواكه او ٣ ملاعق من اكثر طبق تحبيه ...


الوجبه المفتوحه:-







عندي يوم في الاسبوع اكل فيه وجبه مفتوحه مو اليوم كلو اروح مطعم او اطلب من المطعم والحلا مرا 

وحده يا قبل الوجبه ب٣ ساعات يا بعدها ب٣ ساعات عشان المعده تهضمها وما تتخزن بس دهون




اعرف قرقرت كثير كنت ابغاه موضوع شامل متكامل واتمني اني اكون افدتكم ولو بجزء بسيط 


وسامحوني اذا في اخطاء املائيه...

هناك 6 تعليقات:

  1. روعه التدوينة شكرا لك
    اهم شي الحركة الحركة الحركة والموية وتخفيف اكل الدهون والسكريات
    شوفي مدونتي
    http://artgiving23.blogspot.com/

    ردحذف
  2. انتي جميلة ربي يبارك لك ويبارك بعايلتك ❤��

    ردحذف
  3. كلام حلو وسليم.. اليوم والله فكرت اكتب قصتي كيف تغيرت مفاهيمي وبديت اكل اكل صحي.. وفجاه طحت على البلوق حقك.. ان شاءالله يومين انا بعد اكتب عن قصتي وايش الاسباب الي خلتني ابدا بالطريق هذا.. الحلو انك لما تبدين خلاص مافي رجعه او مايكون لك نفس انك ترجعين لروتين الاكل الي قبل. برافوا عليك

    ردحذف

  4. شكراً جداً علي هذا المقال الجميل وقد قرأته بعناية .. لذا أنصحكم بقراءة مقالي الذي اتمني ان يكون جميل وبهذا ادعوكم لقراءة مقالي الجديد علي موقع هوانم وهو لقراءة المقال التالي :

    http://www.hawanim.net/2016/12/Diet-water.html
    أتمني ان ينال اعجابكم المقال

    ردحذف
  5. تتشرف شركة المثالي جروب للنظافة الشاملة بالمنطقة الشرقية بتقدم شركة تنظيف منازل بالخبر والتي تقدم افضل خدمات تنظيف المنازل والشقق والفلل والمجالس والكنب والسجاد والموكيت بالاعتماد عليافضل الامكانيات الحديثة والعمالة الماهرة وخبرة عشرات السنوات بمجالات التنظيف لجميع اركان المنزل وكل مع يحيط به فمع شركة تنظيف بالخبر تستطيعون الحصول علي افضل جودة ممكنة لتنظيف المنازل بارخص الاسعار المثالية

    شركة تنظيف منازل بالخبر
    شركة تنظيف بالخبر

    ردحذف
  6. تقدم شركة المثالي جروب للنظافة العامة احدي خدماتها المتميزة بمحافظة القطيف والتي يبحث عنها الكثير من اهالي محافظة القطيف الا وهي شركة تنظيف منازل بالقطيف والتي تقدم خدمات تنظيف المنازل - تنظيفالشقق - تنظيف الفلل -تنظيف المجالس - تنظيف البيوت - تنظيف الخزانات -تنظيف المسابح والتي من خلاللها تستطيع شركة المثالي جروب لخدمات التنظيف تقديم افضل خدمات النظافة العامة بمحافظة القطيف بالاعتماد علي كافة الاسليب الحديثة والعمالة الماهرة فمع شركة تنظيف منازل بالقطيف انتم دائما في امان فلدينا

    شركة تنظيف منازل بالقطيف
    شركة تنظيف بالقطيف
    شركة تنظيف مجالس بالقطيف
    شركة تنظيف شقق بالقطيف
    شركة تنظيف فلل بالقطيف

    ردحذف