الصفحات

الأحد، 11 أكتوبر 2015

pumpkin bread


  السلام عليكم ورحمه الله ..

كيفكم ..اخباركم..

ادري اني مقصره هنا .. بس بالنسبالي ابغا اركز على قناتي في اليوتيوب اكثر .. 

وشكرا لكم على الدعم يلي بحصلو منكم احبكم ويسعدكم ربي..

اليوم عملت pumpkin bread 

للحلوين وطلع جدا طعم فحابه اشاركم الطريقه هنا عشان تفضل مرجع للكل ..

pumpkin bread 






المقادير:

كوب دقيق الشوفان
نص كوب دقيق عادي
نص كوب هريس اليقطين pumpkin puree
ملعقه اكل بهارات البمبكن pumkin pie spice 
اذا مو متوفره اخلطي "ملعقه اكل قرفه ، ملعقه اكل زنجبيل مطحون ، نص ملعقه شاي قرنفل مطحون، نص ملعقه شاي بهار اسمو allspice ، ربع ملعقه شاي ملح "
نص ملعقه شاي بيكنج بودر
نص ملعقه بيكنج صودا 
نص ملعقه ملح البحر
نص ملعقه فانيليا سائله
بيضتين
نص كوب عسل
نص كوب زيت جوز الهند
٤ ملاعق ستيفيا

الطريقه :

افتحي الفرن على درجه حراره ١٧٠ْ درجه مئويه
في وعاء اخلطي البيض مع الستيفيا ، ضيفي العسل والزيت وهريس اليقطين اخلطيهم مزبوط
ضيفي المكونات الجافه بس اخر شي البيكنج بودر واخلطيهم مزبوط
حطيها في قالب زي يلي في الصوره فوق بعد ماتدهنيه ودخليها الفرن لمده ٤٠د 
بعد ال٤٠د اغرسي شوكه واذا طلعت مافيها شي معناها خلصت اذا لا
كل خمسه دقايق شيكي..
وبالعافيه..



الأحد، 19 أبريل 2015

فيتامين سي سموثي..






كيفكم يا حلوين ..
إن شاء الله عجبكم الفيديو..
هنا حكتب المكونات كتابةً مع فوائد كل فاكهه ..




المقادير..

٢٠٠ مل عصير برتقال







فوائد عصير البرتقال..
شرب عصير البرتقال بصفه مستمره " طبعا بكميه معقوله لانو في النهايه سكر الفاكهه" يقلل
من الإصابه ب أمراض الكلى وحصوات الكلى..
يعزز من صحه القلب.. 


حبه كيوي




فوائد الكيوي:-
يحتوى على فيتامين سي ومضادات أكسدة تقوي المناعه..
يحارب أمراض القلب ..
غني بالألياف ..
مصدر جيد لفيتامين E وفيتامين E من الفيتامينات المهمه للبشرة..





كوب فراوله مجمده..








فوائد الفراولة..
الفراولة مصدر غني بالfolate الفوليك أسيد الموجود في الغذاء..
تقلل من احتمال الإصابه بأمراض القلب والأوعيه الدموية..
تحتوى على 100% من احتياجنا اليومي لفيتامين سي في كوب واحد..
تحتوى على البوتاسيوم بنسبه عاليه، والبوتاسيوم  يحافظ على مخزون الكالسيوم في الجسم ويقي من 
الإصابه بهشاشه العظام..
تحتوى على" الأنثوسيانين" وهو عباره عن مضاد اكسده قوي يحمي من اضرار البيئه وبالذات الشمس
و "الأنثوسيانين " الموجود في الفراوله يحمي لمده ٢٤ ساعه.
قليله في الكالوريز وعاليه الألياف..




نص موزه " عشان تحلي الطعم"





وبالعافيه..


الأحد، 12 أبريل 2015

DIY MASON JARS







    السلام عليكم ...
      اول موضوع ليا في دا القسم وناويه بحول الله كل شهر انزل موضوع هنا.. 

   موضوع اليوم عن الكاسات يلي طحنا فيها بعد الانستقرام.. ال mason jars 

  اشريت منها كثير من ساكو كانت تجي بالكرتون ..

  حبيت اضيف جو في الغرفه بديكور مو مكلف.. 

الادوات يلي نحتاجها..

ال mason jars




foam brush من جرير





sandpaper من جرير 




الوان إكليرك "acrylic" من جرير كمان..




كدا خلصنا الاشياء يلي نحتاجها..

ندخل في الطريقه...
عشان يطلع عندك الاومبري إيفكت

تختارو اللون يلي تبغوه انا اخترت البنك.. وتجيبو الابيض للتفتيح ولون يغمق
عشان بنك اخذت احمر.."ممكن تستغنو عن دي الخطوه وتاخدو اللون لوحدو وتفتحو بعدين بالأبيض"
اول لون خلطت البنك مع نقطه احمر..




ونشتغل تلوين..








دحين نضيف اللون البنك لحاله..



وبعدين نبدأ نضيف شويه شويه الابيض..



وهكذا..








والنتيجه..




انا خليتها يوم تنشف..
دحين نجيب الsandpaper
               ونفرك في اجزاء معينه عشان يعطينا الفنتج لوك "vintage look"..




وكدا بعد..





وبس خلصنا.. ممكن ٣ بدل ال٤ على حسب انت ايش تفضلي .. وحطينا الورود فيها..


ألوان اخرى..

الأخضر...



 الأزرق..




اتمنى تكون التدوينه عجبتكم في انتظار تعليقاتكم الجميلة..


خلف الكواليس<< عاجباني الكلمه شكلها ههه




الأحد، 5 أبريل 2015

سلطة ماما














السلام عليكم..
كيفكم ايش اخباركم..
عن جد مكسوفه منكم الموضوع دا اتعكس تعكيس رهيب
بس حنزلو بحول الله ..
هادا غير الفايروس يلي عطل الكمبيوتر
الصور اختفت من عندي مو لقياها في الموميري..
ما علينا صح << تسلك لنفسها..
ندخل للموضوع يكفي مقدمات ومقبلات<< نستظرف



المكونات:
الخضروات:
ملفوف احمر واخضر
جزر 
سبانخ
نعناع 
بقدونس
فلفل اصفر 
خس
منجا
الكميه على حسب حجم الحصه
الصوص:
ماما حطت خل البلسمك " بس في لون صناعي"
البديل خل التفاح "فنجان قهوه اذا تبغو حامض ونص فنجان اذا مو مره حامض"
نص فنجان قهوه زيت زيتون
ملعقه اكل ماسترد


تلاقوها في قسم المنتجات الطبيعيه في مانويل والدانوب
ملعقه اكل عسل 
رشه فلفل اسود
حاولت ازبط الكميات قد ما اقدر طبعا انتو شفتو النقاش
حول دا الموضوع في الفيديو ههههه
التزين:
نحمص التورتيلا بالشوفان او اي تورتيلا صحيه
تلاقوها في الدانوب ومانويل 
في الفرن الين ما تتقمر 
نحط فوقها عسل ، حبه بركه،سمسم،لوز
ونرجع نحط شويه عسل..
وباقي السمسم وحبه البركه واللوز 
نحطها في السلطة..



تحطو الصوص فوق السلطه ولا تحطو التورتيلا الا وقت التقديم
وخلوها في الثلاجة على الاقل نص ساعه قبل الاكل..
وسلامتكم..







الأربعاء، 4 فبراير 2015

smoothie of the week-2 "BERRIS and MORE"


السلام عليكم ..

ادري دي الفتره مقصره بقوه في الانستقرام .. بس ان شاء الله فتره وتعدي

اليوم جبتلكم وصفه سموثي الاسبوع..

اطلقت عليه اسم "berris and more"




و كالعاده خلونا نتكلم شويه عن فوائد المكونات:-

عائله البيري يلي هيا"البلوبيري- الروزبيري-البلاك بيري - الفراوله"

غنيه جدا بالمعادن والفيتامينات فمثلا كوب من الفرواله يعطيك احتياجك اليومي

الكامل من فيتامين سي..

والبلاك بيري يعطيك احتياجك اليومي من المنغنيز.." المنغنيز ضروري للدماغ والجهاز العصبي-صحه العظام

ويحافظ على مستوى السكر في الدم"

عائله البيرز فيها مضادات اكسده عاليه ومضدات الاكسده تساعد على الوقايه من امراض كثيره

ومن ضمنها السرطان..






الكرز..

تناول الكرز يحمي من امراض القلب ..

وكمان يحمي من الاصابه بالسرطان..

معزز للذاكره..

يحتوي على الميلاتونين ايش يعمل حبيبنا دا ينظم دوره النوم

عاد البرتقال ما يحتاج نتكلم في من زمان بناخد فوائده..

حطيت بودره اسمها آكي من الاطعمه الخارقه"السوبر فود" كتبت عنها هنا


دحين نروح للمقادير:-



* ١٠٠ مل عصير برتقال

*١٠٠ مل مويه

* كوب مكس بيريز مجمد "بلوبيري-روزبيري-بلاك بيري- فراوله"

*نص كوب كرز مجمد.

*ملعقه اكل آكي بودر..

وبالعافيه..

ممكن بدل المويه والبرتقال.. تحطو حليب وزبادي يناسب للفطور اكثر وتضيفو بروتين..

وبس..

اشوفكم على خير..


الاثنين، 26 يناير 2015

smoothie of the week-1

السلام عليكم …

كيفكم ..اخباركم ..

قررت كل اسبوع احاول انزل سموثي هنا..

فالسموثي حق دا الاسبوع .. ياسلام سلم طعم ومنعش..




نتكلم عن اهم فوائد بعض المكونات..

الاناناس..

  • يكافح الرشح وعوارضه بسب احتوائه على الفيتامينات وخصوصآ فيتامين C

  • يكسر العطش والحر في الصيف وبسبب كثرة الماء في تركيبه فإنه يمنع ضربات الشمس

  • يمنع تراكم الدهون داخل الأوعية الدموية خصوصآ الشرايين، لذلك يمنع تصلب الشرايين

  • يسّهل هضم الطعام ويمنع قبوضة المعدة



العنب الاخضر

 يحتوي على نسبة جيدة من العناصر المعدنية مثل Vit- B ؛ ويحتوي على  البوتاسيوم والكالسيوم والصوديوم 

كما يحتوي العنب على مواد ذات مفعول علاجي حيث يحتوي على مركب يعرف ب ٍResveratol  وتتميز هذه المادة على تأثيرها الإيجابي في الحد من تصلب الشرايي

الليمون

الليمون مفيد في تضميد الجروح والقروح ونزيف الأنف وترميم الأنسجة.

يزيد في إدرار البول ومقاومة التسممات

يستعمل الليمون كدواء شاف من الأوبئة والأمراض والإنفلونزاوالسعال.




الزنجبيل

  • طارد للغازات والرياح.

  • معرق وملطف للحرارة.

  • يدخل في علاج آلام الحيض.

  • وسيلة لعلاج أمراض المعدة والأمعاء

يقوى الجهاز المناعي بالجسم لتنشيطه الغدد –أي أنه مضاد حيوي طبيعي


النعناع

مريح للاعصاب يسهل التنفس، يدر البول

قال ابن قيم عن الحبق: (شمه ينفع من الصداع الحار. ويجلب النوم ومسكن للمغص ومقوي للقلب). وأضاف ابن سيناء: "إن أزهاره منشطة وهاضمة وتزيل الصداع الناتج من الزكام".


المكونات والمقادير




كوب اناناس مجمد.

نص عصير ليمونه

كوب مويه

كوب عنب اخضر"اتأكدو يكون حلو"

شويه نعناع قبضه يد مثلا..

برشه زنجبيل..

ثلج

وبس بالعافيه….

ممكن تحطو سبانخ وخيار معاه…..




السبت، 17 يناير 2015

Best of 2014..








السلام عليكم …

اول تدوينه في قسم ال beauty..

من زمااان قريبا سنتين قررت احول من البيوتي للصحه …

دحين اتحمست ارجع تاني التنويع حلو..

وماحبيت اتأخر عن دي التدوينه بالذات عشان تقريا عدا اول شهر من ٢٠١٥..

بما انو كنت مركزه على الصحه اكثر في ٢٠١٤ ما جربت اشياء كثير ..

فيمكن حيكون في قصور في حكايه تذكر الاسعار..

اول حاجه حتكلم عن الاشياء يلي حبيتها من المكيااج..



اول شي.. باليت شدوهات من لوراك..






اسمو لوراك ميجا برو ..لميتد اديشن

حطيتو من المفضلات لانو صراحه في الوان جدا عمليه و صفين مات وصفين شيمر..

والبيجمنت حقها جدا عالى باليت من مجاميعو..

عموما انا حبيت لوراك اكثر من نيكد بس العيب الوحيد انها تتناثر وحلها بسيط احط الشدو قبل

ما اعمل الوجه..

سعرها اظن كان ب٣٧٠ << قلتلكم الاسعار مراح افتكرها مزبوط..

اخدتها من حبيبتي   lody shop    في الانستقرام..

ثاني حاجه برضها من القمر لودي ..





باليت بلشرات من تارت اسمو pin up girl ليمتد اديشن

من زمان نفسي اجرب بلشرات تارت بس كنت محتاره اخد اي لون

ولما نزلو حق الهوليدي شفتها فرصه اجرب كذا لون والبكيج كمان يجنن.. وحطيتها مفضله

لانو بصراحه البجمنت حقها عالي وعندي في مستوي بلشرات ماك..

في لونين مات اول واخر واحد والثلاثه يلي في النص فيها شيمر…

نجي للسعر ياويلي علي حسب ما افتكر ٢٠٠ وحاجه فوق الخمسين..

ثالث حاجه من بوبي بروان..



لما رحت دبي في اكتوبر اخدت مع البي بي كريم التنتيد موسترايزر اسموextra spf 25 tinted moisturizing balm

درجتي medium tint ..

جدا حبتو خفيف على البشره وتغطيتو متوسط لخفيف ينفع لكل يوم للبشره الجافه ما ينفع للدهنيه..

السعر ..هههههه الله اعلم بس في حدود 205 درهم..

و سقط سهوا.. وهل يمكن ان انسها مسكره الحواجب gimme brow  من بينفيت




عن جد رهيبه وفرشتها السبب ..احاول اجبلكم سعرها



خلصنا من المكياج..

دحين نروح للبشره..

اول حاجه اعظم اختراااع ..



الكلارسونيك ميا ٢ عن جد عن جد رهيبه وحطي فلوسك وانت مرتاحه.. استثمار في جمال بشرتك

تنظف من قلب .. وتصفي البشره..

من سيفورا اخدتها من ٧ شهور ب٧١٧..

تاني حاجه لوشن للجسم..



لوشن للجسم صح ريحتو مش ولا بد مو مرا بطاله بس الترطيب الرهيب 

من st.lves و يناسب البشره الحساسه عشان مو معطر واحد مجدد للبشره بفيتامين e 

والثاني للترميم العميق بزيت اللوز اسعارهم في حدود الثلاثين او حاجه وثلاثين من الدانوب وحجمها حلو ٦٢١ مل

اخر حاجه استخدمتهم شهر ونص .. وقلت لازم اتكلم عنهم..



اول حاجة اغلبكم عارفين الفتره يلي فاتت نفسيتي كانت جدا تعبانه ومضغوطه مع مرض وبابا و المشاكل

عن جد اول مره كدا حالتي تكون وانعدمت بشرتي طلعت حبوب كثيره..

لما رجعت البيت رحت الدانوب واخدت من كلين اند كلير غسول ومرطب للحبوب الغسول يساعد على

ازاله الحبوب والمرطب يساعد على منع ظهو الحبوب.. استخدمتها مره وحده في اليوم قبل النوم

عشنها قويه مع الكلارسونيك وعن جد خفت بنسبه ٨٥ ٪ باقي الاوضاع تهدأ واروح دكتور بشره..

اخر حاجه حتكلم عنها الشعر..



هما اربعه اشياء اول حاجه..



دا الشامبو رهيب من لاش شفت مدح عليه في اليوتيوب كثير..

جدا حلو وبالذات للشعرهم دهني..ينظف من قلب باملاح البحر بس لو فروتك مجروحه انسي تستخدميه..

يعطي فاليوم للشعر كمان…

اتوقع سعرو في حدود ١٠٠ وحاجه اقل من الخمسين ..

وثاني شي..




الشامبو والبلسم من organix

في كذا نوع انا اخدت الموف كثيف ومليان… thick &full

المادتين الاساسيه في البيوتين "فيتامين ٧" والكولاجين..

نقص البيوتين في الجسم يسبب تساقط الشعر …

المهم عن جد يخلي شعرك كثيف ومليان ما كذبو وحلو ومع البلسم ناعم خلصت علبتين..

معلومه .. من خبير للشعر لما تحطي شامبو حطي كميه صغيره في يدك حطي شويه مويه

وافركيها في راحه يدك وبعدين حطي الشامبو بس في فروه الراس..

السعر ب ٥٠ ريال تقريبا انا جبتو من وايتس في السلام مول..

وشفتو في مانويل..




ودا البخاخ كمان قبل ما اعمل تسريحه ابخو على الجذور ويعطيكي فاليوم جميل ناسيه السعر مره..

اخر شي اعظم فرشه..



ويت برش من وايتس الرهيبه ما تعور الشعر وما تطيح الشعر سواء ناشف او مبلبل

كانت بنتي معذبتني في التمشيط بعد ما جبتلها دي الفرشه ياسلام .. بصمت عليها وخلاص..

في النهايه ..تهمني ارآكم في اول موضوع في قسم البيوتي..