الصفحات

الثلاثاء، 24 يونيو، 2014

نظام رمضان




السلام عليكم …


اخباركم ياحلوين ربي يبلغنا رمضان غير فاقدين ولا مفقودين واحنا وانتو بصحه وسلامه…
رمضان دي السنه تاني رمضان ليا في النظام الصحي الحمد لله…


حبيت اقلكم على نظامي مناسبني طبعا كل واحد يختلف عن الثاني ويلي يمشي معايا

 مو شرط يمشي مع غيري كل واحد يختار يلي يناسبو ويمشي مع حياته 

 عشان يقدر يكمل على النظام.. 

رمضان تنقسم الناس في نوعين ناس تنحف وناس تتخن وبصراحه الاثنين تقدري توصليلهم بسهوله..
فضفضه سريعه…






من يوم ما يقرب رمضان والناس تضارب وتحارب في السوبرماركت وعربيات اثنين وثلاثه واربعه
تقولي احنا ما ناكل غير في رمضان ولما اخرج في عصر رمضان حرب وضرب على الفول والتميس والسوبيا وكل حاجه خير ان شاء الله غير انو ريحه البلد احسها زيووووووت <<< من غيري يشم كدا



المهم نرجع …


قلتلكم قبل كم مره نظامي قبل الحياه الصحيه برضو ماكنت اكل فوق احتياجي بس ما كنت اكل اكل مفيد
اتعودت على مبدأ


 "نحن قوم لا نأكل حتى نجوع وإذا أكلنا لا نشبع"



: والمبدأ الثاني علمنا هو رسول الله صلى الله عليه وسلم يقول

"ما ملأ ابن آدم وعاء شراً من بطنه بحسب ابن آدم أكلات يقمن صلبه فإن كان لا محالة فثلث لطعامه

وثلث لشرابه وثلث لنفسه"


                 مبدأ الاعتدال ياجماعه


المهم احنا فطورنا اغلب الايام عند اهل زوجي ربي يجعل بيتهم دايم وعامر ..



فضفضه مهمه..


ماما الله يديها الصحه والعافية ما كانت تدخل الفيمتو في البيت بتاتا فما اتعودنا عليه المهم عند اهل 

زوجي من اساسيات السفره زي كل الناس …


رمضان يلي شربت في كاسه فيمتو على الفطور ونفس طريقه اكلى وزني زاد ثلاثة كيلو .. متخيلين



الفيمتو عباره عن ايش سكر ومويه ومنكهات والوان صناعيه كلها حاجات مو طبعيه بالنسبه للجسم 

واكثر حاجة في السكر <<< سم قاتل بدي الكميه 

وغير كدا اللون الاحمر واللون الاصفر من اخطر الالوان الصناعيه واحنا حتى الاولاد نشربهم 


واذا ما كفاه شر كمان  يقلل من قدره الجسم على امتصاص الفيتامينات والمعادن "خبيره التغذية ساره 

الكندري" يعني لا خيرك ولا كفايه شرك اكثر من كدا تبغو عشان توقفوه…

كان لازم اتكلم عنو خصوصا هو اساس السفره الرمضانيه عند اغلب الناس

نرجع لنظامي اول يوم رمضان يكون وجبه مفتوحه..

باقي الايام ..

الفطور..


اول ما يأذن اكل رطب واشرب لبن وبعدها كاسه مويه
اصلى المغرب واكون جايبه معايا قرين سموثي عشان ادخل الخضار في جسمي كدا اكون شبعت
واذوق ملعقه وحده من الموجود في السفرة

او اعمل شوربه خضار وسمبوسه بالقمح الكامل وفي الفرن

بعد ساعتين ل٣ ساعات بعد الفطور اشرب سموثي حق قبل الرياضه لانو زي ماقلنا لازم
نحرك جسمنا لو نص ساعه في اليوم…



الوجبه التانيه:-

تكون وجبه  صحيه ومغذيه..






السحور قبل الامساك :-


٣ حبات تمر محشي لوز او بندق  وموزه

وكدا انتهي اليوم…
هادا جدولي في رمضان ..
ناسبني رمضان يلي فات وبحول الله مستمره عليه …














نصايح خفيفه….


المقالي والسمبوسه:




نصايح عشان نبعد عن الدهون والكلسترول في السمبوسه 


* بدلو الدقيق الابيض بدقيق القمح الكامل


* الزيت العادي  بزيت زيتون 


* اعملوه في الفرن بدل ما تقلوه او في قلايه تيفال يلي بملعقه زيت واستخدمو زيت جوز الهند 

* الحشوه ممكن دجاج مع خضار لحمه او جبنه فيتا اللايت من المراعي وشبت وبقدونس


الحلويات في رمضان…



بمختلف انواعها  لا تكلوها بعد الفطور احسن شي اذا تبغو تاكلو منها شويه


بعد الفطور بساعتين لثلاثه ساعات  واشربو قبلها كاسه مويه عشان لا تنقضو  لو اكلتوه بعد الفطور 

المعده لسي بتهضم وحيتحول دا الشي طوالي دهون لاكن بعد الاكل بساعتين وثلاثة المعده تهضمو..

واذا لازم لازم تحلي بعد الفطور وماتقدر تنتظر امسكي الملعقه الصغيره حقت الشاي وذوقي احب حلا 

عندك ...


الماااااااء:-







عشان نعوض فتره الصيام لازم كل ساعه نشرب كاسه مو بس في الفطور وقبل الامسك …

اهم نصيحه للناس يلي ماتقدر تتحكم بكميه الاكل وتوصل للبشمه ولما نروح عزايم


قبل ما تاكلو اشربو مويه كثير حتشبعو سريع…



الرياضة في رمضان …



الرياضين المتقدمين ممكن  نص رياضتها قبل الفطور  والنص الثاني بعد الفطور 

بساعتين الثاني بعد الفطور بساعتين على الاقل...


المبتدئين و يلي ما يقدر يتمرن على معده فاضيه <<<  حتى المشي  بعد الفطور بساعتين
لثلاثة ساعات ..

دايما اقول الجسم يحتاج لو نص ساعه حركة يساعد على حمايه القلب من الامراض يقلل نسبه
الاصابه بالسكري 

أطعمه تعطي احساسا باشبع لفتره طويله…

الشوفان ـ التمرـ البيض- لبن الزبادي قليل الدسم او الزبادي اليوناني- اللوزـ الشوفان- 

التفاح- البقوليات- الخضروات 



في النهايه ما نبغا نشوف دي المناظر٠٠٠


واتنمالكم رمضان صحي وربنا يتقبل صيامنا وقيامنا



BE HAPPY EAT HEALTHY

هناك 3 تعليقات:

  1. يعطيك الف عافيه
    وان شاء الله رمضان هذا يكون مختلف ونحال ونغير عاداتنا
    المهم صحتنا اولا واخيرا

    ردحذف
  2. الله يوفقك ويبارك لك في كل اسرتك

    ردحذف